Gherdëina y Val Badia: Al'assistënza sanitara ti vára bun al momënt

La Jonta provinziela ti raions ladins (3/5): Messner se barata fora cun i ombolc - l'assistënza sanitara de basa y de emergënza é garantida te Gherdëina y tla Val Badia y vëgn renforzada

SAN MARTIN DE TOR (LPA). Co che la jënt te Gherdëina y tla Val Badia ciafa aiüt en prescia y dess gní assistida bun tla vita da vigni de dai doturs él sté l'assessur provinzial ala sanité Hubert Messner che á splighé en gaujiun dla sentada straordinara dl Govern provinzial a San Martin de Tor cun i ombolc.

"La jënt mëss podëi se tralascé sön le fat che ara ciafa aiüt sanitar en prescia y poscibilmënter dlungia so paisc de residënza. Y porchël renforzunse y conliunse i sorvisc dan man", á dit Messner.

La assistënza sanitara de emergënza é laurada fora bun sides tla Val Badia co te Gherdëina y é garantida vintecater ores sön vintecater, á dit Messner.

Ia por le de sciöche ince dadoman y dassëra él a desposiziun i joleri cun le dotur de emergënza. Dër dlungia é les bases dl joler de emergënza Pelikan a Porsenú y chëra dl joler dl Aiut Alpin a Pontives/Laiun.

De nöt o canche le bur tëmp ne conzed nia da joré él i doturs de emergënza che surantol le sorvisc pian ia dai ospedai da Bornech y da Porsenú, adöm cun les staziuns di sorvisc de salvamënt sön le post.

Ince la assistënza di doturs de ciasa y di pediatri é aladô de Messner fondamentalmënter garantida tles valades ladines. Por chësc él 14 doturies y doturs de medejina generala sciöche ince döes doturies di mituns che an pó se chirí fora, che laora tles valades.

"Nosc fin é chël da conlié les prestaziuns le plü che ara vá y che i doturs de ciasa, i raiuns soziai, les apoteches, i ospedai y i sorvisc de medejina nüs laores ciamó damí adöm", á sotrissé Messner.

Chiló él da tigní cunt dantadöt por Gherdëina y por la Val Badia che al vëgnes curí do i posc' sciöche ince da tigní cunt dla domanda ti tëmps de piza turistics, á splighé l'assessur provinzial.

An se sforza bele sëgn dassënn da chirí doturs de medejina generala y le contrat provinzial ajunté, firmé dan da püch por la medejina generala, vëiga danfora che le laur da dotur de ciasa vëgnes fat plü atratif, dantadöt ti raiuns da munt.

La Provinzia svilupëia inant deperpo l'assistënza dlungia i paisc de residënza y plü avisa cun zëntri soziai, ospedai soziai, sorvisc nüs y cun la hotline sanitara 116117, che vëgn porvada fora al momënt a Balsan mo che sará ativa tl dagní ince a livel provinzial.

Odü dant tl dagní él aladô de Messner implü ciamó che al vëgnes pité medejina telematica y n lian plü sterch cun les apoteches tla prevenziun y tla assistënza.

A pié ia dal tert altonn dl 2026 vëgnel ince daurí vintecater ores sön vintecater le zënzter sozial a Bornech. Bele da d'aisciöda daverc é i zëntri soziai da Porsenú (vintecater ores sön vintecater) y chël da Tlüses (ia por le de i dis da laur).

Te chësc contest él ince gnü debatü sön n ampliamënt poscibl dl raiun soziosanitar da Picolin tla Val Badia te n zënter sozial cun ciamó de plü sorvisc dezentrá sciöche ince l'ampliamënt dla sënta dl raiun sozial a Urtijëi te Gherdëna te n zënter sozial.

I zëntri soziai liëia adöm sot a un n tët de plü sorvisc sanitars y soziai y pita n aiüt asvelt te de pici caji de prescia y vijites por amará cronics.

san/kat