A San Martin de Tor focus sun mubltà y segurëza dla nfrastrutures

La Jonta va ti raions aministratifs: l assessëur Alfreider à fat l pont di pruiec nfrastruturei y de mubltà cun i ambolc dla Val Badia y de Gherdëina, auzan ora la mpurtanza dla segurëza.

SAN MARTINO DE TOR (USP). Ntan l danmesdì de n merdi ai 13 de utober se à la Jonta provinziela de Bulsan abinà te na senteda straurdinera tl Museum Ladin a San Martin de Tor cun i ot ambolc dla Val Badia y de Gherdëina.

Danter la tematiches zentreles tratedes sun l ordn dl di, de cumpetënza dla Provinzia Autonóma de Bulsan y che à da n fé cun la doi valedes ladines, fòvel nce chëla dla mubltà. Te valedes coche la valedes ladines taca la mubltà dantaldut adum cun la cuestion dla segurëza. On na bona rë nfrastruturela y lëures che va sëura i cunfins cumenei ora y che ie da fé unì segures. Tlo vàl nce tres la efiziënza dl trasport publich, ora che dla mubltà privata. Perchël ie la segurëza al prim post,“ à sotrissà l assessëur provinziel per la Mubltà y la Nfrastrutures Daniel Alfreider.

Seguré a puntin la streda statela dla Val Badia

A mez mei iel unì finà via i lëures per la segurëza acioche l ne vënie nia ju sasc y material dlongia la streda statela dla Val Badia (SS244), te n cuordinamënt strënt danter l Servisc dla Forestela y l Servisc dla Stredes dla Provinzia Autonóma de Bulsan, mprejes de Südtirol, tecnics, lauranc y patrons di grunc. N ntervënt che ie unì fat se tenian al cronogram, che ie jit debujën do che l chëifer ova danejà l bosch de prutezion. L assessëur Alfreider à nunzià che dai 24 nchin ai 25 de utober unirà la streda inò stluta per plu lëures per seguré mo deplù la streda.

For n con' dla segurëza sun streda à la Jonta provinziela de juni dl 2026 dat pro la variazion dla carateristiches tecniches per l ntervënt che reverda l tòch de streda danter Longega y Piculin tla Val Badia (de chël che la USP à bele repurtà): Per chësc fin iel preudù la nstalazion de 36 rëms contra i sasc, dlongia l adatamënt di lëures idraulics y plu mesures de segurëza ntegrativa.

Zircumvalazion de Sëlva

N auter lëur sun chël che n aspieta ie chël pra la streda statala (SS 242) de Gherdëina y Jëuf de Sela: la zircumvalazion de Sëlva, n ntervënt finalisà per alesiré l trafich de passaje tl zënter abità.

Troi dala rodes

L assessëur provinziel Alfreider à fat l pont cun i ambolc nce n con' dla mubltà dla rodes. L ie unì damandà ciun che ie l iter per ti jì permez ala realisazion di lëures, tulan per ejëmpl l troi dala roda pra l Jëuf de Valparola: Nscila iel unì partì su la cumpetënzes danter Chemuns (che se damanda i pruiec), l Cunsorz di Chemuns (che i realisea) y la Provinzia Autonóma de Bulsan (che i finanzieia).

Tlo iel danman l test per badiot.

gm/red