A San Martin de Tor focus sön mobilité y segurëza dles infrastrotöres

La Junta ti raiuns 5/5: l'assessur Alfreider á fat le punt dla situaziun sön i proiec infrastrotorai y de mobilité cun i ombolc dla Val Badia y de Gherdëna, sotrissan la importanza dla segurëza.

SAN MARTIN DE TOR (USP). En mertesc, ai 13 de otober danmisdé se ál abiné te na sentada straordinara tl Museum Ladin a San Martin de Tor la Junta Provinziala cun i ot ombolc dla Val Badia y de Gherdëna.

Danter i argomënc tratá sön l'ordin dl de, de competënza dla Provinzia Autonoma de Balsan y de responsabilité dles döes valades ladines, chël dla mobilité. "Te valades sciöche chëres ladines pëia ia la mobilité dantadöt dala segurëza. I un na bona rëi de infrastrotöres y laurs che vá sura i termi de comun fora, che mëss ester sigüsc. Chiló pëiel ince ia la efiziënza dl trasport publich y la mobilité privata. Por chësta rajun él da mëte la segurëza al pröm post", á sotlinié l'assessur provinzial ala Mobilité y ales Infrastrotöres Daniel Alfreider.

Mëte al sigü la strada statala dla Val Badia

A mez ma él gnü stlüt jö i laurs da mëte al sigü la strada statala dla Val Badia (SS244) cuntra la tomada de peres y material detritich, te n coordinamënt strënt danter Sorvisc forestal y Sorvisc dles strades dla Provinzia Autonoma de Balsan, firmes sudtirolejes, tecnics, lauranc y patruns di terac. L'intervënt é gnü realisé en linia cun le cronoprogram, che ê jü debojëgn do che l'arlogn â danejé le bosch de proteziun. L'assessur Alfreider á anunzié che al gnará ciamó n iade stlüt la strada danter i 24 y i 25 de otober por de atri laurs de segurëza.

Dagnora en cunt dla segurëza dles strades á la Junta Provinziala aprové de jügn dl 2026 la variaziun dles carateristiches tecniches dl intervënt che revardará le toch de strada danter Longega y Picolin tla Val Badia (de chël che l'OSP á scrit chiló): por chësc fin él preodü che al vëgnes metü 36 barieres che tëgn zoruch les peres, l'adatamënt di laurs idraulics y de atres mosöres de segurëza integratives.

Zirconvalaziun de Sëlva te Gherdëna

N ater laur che an se aspeta é chël sön la strada statala (SS242) de Gherdëna y dl Ju de Sela: la zirconvalaziun de Sëlva te Gherdëna, intervënt cun le fin da alisiré le trafich che passa fora por le zënter.

Trus dles rodes

L'assessur provinzial Alfreider á ince debatü cun i ombolc sön l'argomënt dla mobilité ziclistica. Al é gnü damané ciun che é le tru da tó por realisé i laurs, tolon sciöche ejëmpl le tru dles rodes sön Valparola: al é insciö gnü recordé la despartiziun dles competënzes danter i comuns (che se damana i proiec), le Consorz di Comuns (che i realisëia) y la Provinzia Autonoma de Balsan (che i finanziëia).

Le test por gherdëna é da ciafé chiló.

gm/red